Umboðsráðsval 2024

Umboðsráðsvalið 2024

Í Umboðsráðnum kanst tú gera tína ávirkan galdandi í Betri. Betri er eitt felag, vit eiga í felag, og tryggingartakararnir í Betri Trygging hava rættin at stilla upp til Umboðsráðsvalið.

Atkvøð her

Soleiðis velur tú

25 valevni hava stillað upp. 18 valevni eru í at velja, sum næstu fýra árini skulu sita í ráðinum og umboða teg. Valtilfarið fært tú sendandi við postinum. Her fært tú eitt loyniorð, sum verður brúkt til talgilda atkvøðugreiðslu.

Eisini er ein atkvøðuseðil, um tú heldur vilt atkvøða við brævi.

Umboðsráðsvalið verður frá 9. til 24. September, og atkvøðufreistin er tann 24. September.

Atkvøð her

Hví velja vit til Umboðsráðið?

Ognarfelag Tryggingartakaranna er eitt limafelag við avmarkaðari ábyrgd. Ert tú tryggingartakari hjá Betri Trygging og hevur fastan bústað ella heimstað í Føroyum, so ert tú limur í felagnum. Og so hevur tú rætt til annaðhvørt at stilla upp ella at velja títt umboð í felagnum.

Val til Umboðsráðið er annaðhvørt ár.

Treytir hjá valevnum

Fyri at kunna stilla upp til Umboðsráðið, skalt tú:

Hava fastan bústað ella arbeiði í Føroyum.
Vera myndug/ur og hava ræði á búgvi tínum og hava vanligt umdømi, ið ikki ger teg óegnaða/n ella óverduga/n at vera umboðsfólk.
Ikki hava fráboðað gjaldssteðg, hava biðið um neyðskuldarsemju, trotabúviðgerð ella skuldarumskipan.
Ikki vera undir gjaldssteðgi, trotabúsviðgerð, skuldarumskipan ella neyðskuldarsemju.
Ikki vera dømd/ur fyri brot á revsilógina ella lóggávuna um fíggjarligt virksemi ella hava framt onnur lógarbrot og harvið skaða títt umdømið, sum síðan ger teg óverda/n at vera umboðsfólk.
Lúka treytirnar fyri atkvøðurætti (sí undir treytir hjá veljarum.)

Harumframt kunnu núverandi og fyrrverandi stjórar, starvsfólk í felagnum og dótturfeløgum og teirra hjúnafelagar ella sambúgvar ikki veljast sum umboðsfólk. Tó kunnu fyrrverandi starvsfólk, tá ið 7 ár eru liðin, síðani hesi fóru úr starvi, veljast til umboðsfólk. Eingin kann virka sum umboðsfólk, um tey eru sett í starv ella arbeiða fyri virkið, sum er kappingarneyti hjá felagnum og tess dótturfeløgum.

Treytir hjá veljarum

Fyri at kunna velja til Umboðsráðsvalið, skalt tú hava verið limur í felagnum síðani seinasta 1. juli fyri valið.

Hevur tú atkvøðurætt, hevur tú minst eina atkvøðu og í mesta lagi 10 atkvøður fyri allar teknaðar tryggingar.

Hevur tú teknað trygging, har árliga tryggingargjaldið er minni enn kr. 50.000,-, hevur tú eina atkvøðu. Fyri hvørjar byrjaðar kr. 50.000,- í árligum tryggingargjaldi harafturat, fært tú 1 atkvøðu upp til í mesta lagi 10 atkvøður.

Partafeløg, smápartafeløg, íognarfeløg, feløg, stovnar og aðrir juridiskir persónar kunnu lata atkvøðu við formanni teirra, stjóra, leiðara ella umboðsstjóra.

Spurningar og svar

Hvar fer valið fram?

Tá uppstillingarlistin er komin upp á pláss, verður valið útskrivað í september, og bræv við loyniorði, at brúka til talgildu valskipanina, sent øllum, sum hava atkvøðurætt. Í brævinum er eisini ein QR koda, sum vísir beint til skipanina, har tú kanst greiða atkvøðu. Tá ið alt er talt upp, verður úrslitið kunngjørt í fjølmiðlunum.

Hvat ger Umboðsráðið?

Uppgávan hjá Umboðsráðnum er at skipa aðalfundir felagsins. Umboðsráðið velur nevndina í Ognarfelag Tryggingartakaranna, góðkennir roknskapin og tekur støðu til útlutan og annað.

Harumframt kann Umboðsráðið gera av, at tað á hvørjum ári eisini verða hildnir aðrir regluligir umboðsráðsfundir, har m.a. yvirskipað strategisk átøk verða umrødd. Í ráðnum sita 35 limir, sum møtast til fund í mesta lagi seks ferðir um árið: Til ársaðalfundin á vári, til kunningarfund um hálvársroknskapin á heysti umframt fýra fundir um m.a. strategisk mál, virksemi og um samfelagsábyrgd felagsins.

Hvat ger Ognarfelag Tryggingartakaranna?

Ognarfelagið Tryggingartakaranna eigur samtakið Betri. Endamálið hjá felagnum er at umsita ognirnar á best møguligan hátt. Í hesum sambandi antin beinleiðis ella ígjøgnum annað felag at eiga partapening í Betri Trygging og øðrum feløgum og øðrum íløguvirksemi. Allir tryggingartakarar hjá Betri Trygging, sum hava fastan bústað ella heimstað í Føroyumeru eru limir í felagnum og kunnu velja 35 umboð í Umboðsráðið hjá Ognarfelag Tryggingartakaranna.

Kunnu feløg við v-tali verða stillarar

Partafeløg, smápartafeløg, íognarfeløg, feløg, stovnar og aðrir juridiskir persónar kunnu lata atkvøðu við formanni teirra, stjóra, leiðara ella umboðsstjóra og kunnu eisini vera stillarar hjá valevnunum.